Namatay sa edad nga 30-anyos ang kanhi miyembro sa pre-teen singing group nga Sugarpop ug singer sa kanta nga “DOTA O Ako” nga si Vanessa Blanca.
Gipahibalo sa iyang ig-agaw nga si Ivy Ann Salaum Jubelag ang pagkamatay ni Vanessa niadtong Agosto 19, human siya maaksidente sa condominium diin siya nagpuyo sa Manila.
Matud sa iyang ig-agaw, nakaangkon si Vanessa og grabeng traumatic brain injury nga miresulta sa internal brain hemorrhage human siya aksidenteng matumba.
Gisaysay nga nisulod si Vanessa sa cr sa dihang napandol siya ug nahulog, hinungdan nga naigo ang iyang nawong ug ulo sa salog.
Nangayo gilayon ang emergency assistance ug gitawagan ang ambulansya. Apan human sa gibana-banang 15 minutos nga paghulat, wala pa kini moabot, busa gisulayan sa iyang mga kauban nga dad-on siya sa pinakaduol nga ospital gamit ang wheelchair.
Samtang, ipahigayon ang public viewing alang kang Vanessa karong adlawa, Agosto 21, alas-6 sa gabii, sa Loyola Memorial Chapels sa Commonwealth, Quezon City.
