Nakatala og lima ka kamatayon tungod sa leptospirosis ang National Kidney and Transplant Institute (NKTI) sukad Hunyo, taliwala sa mga pagbaha nga dala sa kusog nga pag-ulan ug Habagat.
Sa NKTI, 19 ka kaso ang natala, diin ang pinakabag-o nga pasyente namatay human mograbe ang iyang kondisyon ug nakaangkon og pulmonary hemorrhage.
Matud sa mga doktor, kasagarang ulahi na nga madala sa ospital ang mga pasyente tungod kay dili dayon makita ang mga sintomas.
Lakip sa unang timailhan ang hilanat, sakit sa lawas ug lutahan, ug pagpula sa mga mata. Sa grabeng kaso, mahimong mosangpot kini sa jaundice, pagkunhod sa ihi, kidney failure, ug pagdugo.
Samtang, 50 na ka kaso ang natala sa San Lazaro Hospital, lakip ang 24 ka bag-ong admission sulod sa 24 oras, ug duha ka kamatayon.
Gipasidaan sa mga eksperto nga mahimong mosaka pa ang mga kaso tungod kay ang incubation period sa leptospirosis mahimong molungtad og duha hangtod 30 ka adlaw.
Gipahinumdoman ang publiko nga likayan ang paglusong sa baha.
Kung dili malikayan, magsul-ob og rubber boots, tabunan ang mga samad, ug magpakonsulta dayon kung makasinati og mga sintomas human ma-expose sa baha.
