Nakahatag grabeng kalisang sa mga tinun-an, ginikanan ug magtutudlo ang sunod-sunod nga hulga batok sa mga tunghaan sa Probinsya sa Bohol kini human sa giingong shooting threat sa mga eskwelahan sa Catigbian ug Balilihan, dunay nadawat usab nga bomb threat nga mikaylap sa Sagbayan ug Clarin niadtong Agosto 18,2026.
Sa Sagbayan, gipabakwit sa kapulisan ang mga estudyante ug school personnel sa duha ka eskwelahan isip precautionary measure human makadawat og report bahin sa giingong bomb threat.
Ang hulga gi post sa usa ka Facebook post ang tulo ka bomba nga kuno anaa sa St. Augustine Institute sa Barangay Poblacion ug San Agustin National High School sa Barangay San Agustin, lakip ang Nahawan sa Clarin.
Gilayon nga gi-inspeksyon sa kapulisan ang mga eskwelahan ug nakig-coordinate sa mga school principal. Gihuwat ang clearance sa Explosive Ordnance Disposal o EOD Team sa dili pa ipadayon ang mga klase.
Nakig-alayon na usab ang mga sakop sa kapulisan sa Regional Anti-Cybercrime Unit 7 aron mailhan ug masubay ang nagpaluyo sa online threat.
Gihugtan usab ang seguridad sa mga eskwelahan, lakip ang pagbutang og police personnel ug patrol car sulod sa campus isip precautionary measure.
Giawhag sa PNP Bohol ang mga ginikanan, magtutudlo ug mga tinun-an nga magpabiling kalmado ug dili magpakaylap og wala pa mapamatud-ang impormasyon nga mahimong makadugang sa kahadlok sa komunidad.
