Giduso karon sa Kongreso ang dugang kapin sa 2,000 ka dugang nga guidance personnel sa mga pampublikong tunghaan sa 2027 uban sa gisugyot nga P802 milyon nga pondo aron mapalig-on ang serbisyo sa kahimsog sa pangisip ug child protection services alang sa mga estudyante.
Sumala ni House Minority Leader Marcelino Libanan, ang gisugyot nga P7.2-trilyon nga nasudnong budget sa 2027 naglakip sa paghimo og 1,800 ka mga posisyon sa associate counselor sa eskwelahan ug 221 ka mga posisyon sa school division counselor ubos sa Department of Education (DepEd).
Gipasiugda ni Libanan nga ang dugang nga mga counseling personnel importante labi na taliwala sa mga taho sa bullying, kapintasan sa eskwelahan ug uban pang mga problema nga makaapekto sa emosyonal ug mental nga kaayohan sa mga estudyante.
Dugang niini nga ang gisugyot nga dugang nga pondo tukma sa panahon human sa mga insidente sa kapintasan sa mga eskwelahan, lakip ang pagpamusil ug pagdunggab sulod sa mga campus.
Alang kang Libanan, ang pisikal nga seguridad dili igo aron mapadayon nga luwas ang mga eskwelahan. Miingon usab siya nga ang emosyonal ug sikolohikal nga suporta para sa mga estudyante kinahanglan nga palig-onon.
Miingon siya nga ang mga guidance counselor kabahin sa “unang linya sa depensa” sa mga eskwelahan tungod kay sila makatabang sa pag-ila sa mga estudyante nga nanginahanglan og suporta ug paghimo og mas luwas ug mas suportado nga palibot sa eskwelahan.
Giawhag usab ni Libanan ang mga pribadong elementarya ug high school nga dugangan ang ilang mga serbisyo sa pagtambag, tungod kay matod niya nga ang kaayohan sa mga bata responsibilidad sa tibuok komunidad.
