Misaad si Taiwan President Lai Ching-te nga dili nila ihatag bisan usa ka pulgada sa ilang teritoryo.
Nagpasabot kini nga andam ang Taiwan nga depensahan ang matag bahin sa ilang yuta, lakip ang Kinmen, Matsu, ug Penghu.
Gipahayag ni Lai kini atol sa iyang pagbisita sa frontline island sa Kinmen niadtong Agosto 23, diin iyang gipasidunggan ang mga beterano sa gubat sa ika-68 nga anibersaryo sa 1958 Artillery Battle.
Gipasiugda usab niya nga ang kalinaw makab-ot pinaagi sa kusog ug lig-on nga depensa. Matod niya, kinahanglan nga lig-on ang militar sa Taiwan aron mapugngan ang posibleng pag-atake.
Gisuportahan usab ni Lai ang plano nga dugangan ang badyet sa depensa sa Taiwan.
Matod niya, sulod sa 68 ka tuig, wala mohunong ang ambisyon sa China nga palapdan ang teritoryo niini, nga iyang giingong nakahatag og tensiyon sa Indo-Pasipiko.
Niadtong Agosto 23, 1958, gibombahan sa China ang Kinmen, nga misugod sa Ikaduhang Krisis sa Taiwan Strait.
Nakigbatok ang Taiwan uban sa tabang sa Estados Unidos hangtod nga natapos ang panagbangi nga walay klarong mananaog.
Importante sa depensa ang Kinmen tungod kay duol kini sa baybayon sa China—wala pay duha ka kilometro ang gilay-on sa pipila ka bahin.
