Mimando ang Cebu City Council og ocular inspection sa Binaliw landfill ug uban pang mga pasilidad nga nag-bid aron pagdumala sa solidong basura sa siyudad human gibawi sa Department of Environment and Natural Resources (DENR) ang cease-and-desist order batok sa Prime Integrated Waste Solutions.
Ang lakang gisundan sa pag-aprubar sa usa ka resolusyon nga gisulat ni Konsehal Joel Garganera, Chairman sa Committee on Environment.
Ang resolusyon nagmando sa inspeksyon ug pagtimbang-timbang sa tanang pasilidad nga miapil sa proseso sa bidding sa dili pa mohimo ang siyudad sa katapusang pagpili niini.
Gikinahanglan niini nga ang inspeksyon maglangkob sa kapasidad sa mga pasilidad, imprastraktura, mga lakang sa kaluwasan, mga panalipod sa kalikopan, mga permit ug pagsunod sa balaod ug regulasyon.
Gilatid sa resolusyon, nga ang mga findings ug mga rekomendasyon nga mitumaw gikan sa mga inspeksyon kinahanglan nga mahimong bahin sa proseso sa evalluation ug bidding.
Gipasiugda usab niini nga ang katapusang pagpili sa usa ka disposal facilty kinahanglan nga magkonsiderar dili lamang sa mga panginahanglanon sa pagdumala sa basura sa Dakbayan sa Sugbo apan lakip usab ang kahimsog, kaluwasan, kaayohan ug pagpanalipod sa kalikopan sa host local government unit ug sa mga konstituwente niini.
Sa pikas bahin, mipahibalo si Kenneth Siasar, ang Chief of Staff sa Cebu City Hall, nga hingpit nang giisa sa DENR-Environmental Management Bureau (EMB) Region 7 ang cease and desist order sa Binaliw hinungdan nga gipanghinaot sa kagamhanan ang pagpakig-alayon sa Prime Waste.
Apan gibutyag niini nga dili pa kasiguro ang kagamhanan kung kanus-a pwede makalabay sa Binaliw Landfill.
