Gikatahong dili na kaya nga masustenar ang P20 kada kilo nga presyo sa bugas nga gisaad ni Presidente Ferdinand Marcos Jr. atol sa iyang kampanya sa 2022, tungod sa padayon nga pagsaka sa presyo sa abono, transportasyon, ug lana.
Sumala ni Agriculture Secretary Francisco Tiu Laurel Jr., gikinahanglan ang mga subsidyo sa gobyerno aron mabaligya ang bugas sa P20 kada kilo.
Dugang pa niiini, nga ang presyo miabot na sa halos P2,600 kada sako gikan sa P700 lamang sa dihang gisaad ni Marcos ang P20 kada kilo nga bugas.
Base sa datos gikan sa Department of Agriculture, ang aberids nga presyo sa regular-milled nga bugas gikan sa Agosto 24 hangtod 30 kay ₱44.94 kada kilo. Samtang, ang well-milled nga bugas kay ₱47.73 kada kilo ug ang premium nga bugas kay ₱52.76 kada kilo.
Hinunoa, gipatuman sa administrasyon ang subsidized nga “Benteng Bigas, Meron Na!” programa sa mga Kadiwa outlet, nga sumala sa DA nakabenepisyo sa kapin sa 12 milyon nga mga Pilipino.
Gipasalig sa DA nga walay kakulangon sa suplay sa bugas sa nasud. Bisan pa, ang El Niño gilauman nga makaapekto sa lokal nga produksiyon sa bugas og mga 700,000 metriko tonelada.
Tungod niini, si Tiu Laurel miingon nga ang gobyerno mahimong mag-import pag-usab og bugas human sa panahon sa pag-ani isip pagpangandam alang sa gipaabot nga grabe nga El Niño.
