Nangayo ang kampo ni kanhing House Speaker Ferdinand Martin Romualdez sa Office of the Ombudsman nga patas nga tagdon ang mga alegasyon batok kaniya ug hatagan siya og igong higayon sa pagtubag sa bisan unsang bag-ong pasangil nga may kalabotan sa giingong flood control scam.
Sumala kang Atty. Ade Fajardo, tigpamaba ni Romualdez, gusto nilang mahibal-an kung adunay bag-ong mga pahayag batok sa kanhing Speaker gikan sa kanhing DPWH Secretary Manuel Bonoan o sa 28 ka bag-ong mga saksi nga giingong naglambigit kaniya sa maong isyu.
Matud ni Fajardo, ang kampo ni Romualdez kinahanglan hatagan og igong panahon sa pagtubag sa mga alegasyon samtang anaa pa sa preliminary investigation ang kaso, ug dili lamang kung kini pormal nang ipasaka sa korte.
Niadtong Agosto 20, nagsang-at si Romualdez og supplemental affidavit sa Ombudsman ug mihangyo nga ihunong ang imbestigasyon batok kaniya.
Gipunting sa kanhing Speaker ang pagbawi sa mga pasangil sa lima ka gitawag nga “Maleta Boys,” lakip si Orly Guteza, nga unang mitestigo batok kaniya.
Base sa testimonya ni Guteza, giingon niini nga napugos siya sa paghimo og mga pahayag batok kang Romualdez.
Giinsistir sa kampo ni Romualdez nga human sa pagbawi sa maong mga testimonya, lakip ang mga pahayag sa 25 ka kauban sa mga saksi, wala na kuno’y igong kredibilidad nga ebidensya batok sa kanhing Speaker.
Dugang pa ni Fajardo, nga wala pa’y opisyal sa Department of Public Works and Highways (DPWH), lakip si Bonoan, nga direktang nag-akusar kang Romualdez nga nalambigit sa giingong flood control scam o sa bisan unsang anomaliya sa mga proyekto.
Gipaabot sa kampo ni Romualdez nga hatagan sila og hustong proseso ug oportunidad sa pagtubag sa bisan unsang bag-ong ebidensya o testimonya nga mahimong isumite atol sa preliminary investigation.
