Gipadayag ni Nathaniel Chua, ang Convenor sa Cebu Electricity Rights Advocates (CERA), ang iyang kadismaya sa padayon nga pagsaka sa presyo sa kuryente ug sa giingong kakuwang sa igong aksyon gikan sa mga ahensya nga nagdumala sa regulasyon—sama sa Energy Regulatory Commission (ERC)—aron mapanalipdan ang mga konsumidor.
Matod ni Chua, makapahigawad gayod alang sa mga konsumidor nga sila ang nagsuporta sa mga kompanya sa kuryente, apan wala gihapon sila makadawat og igong proteksyon gikan sa gobyerno.
Gipunting niini nga kon wala ang mga konsumidor, wala’y negosyo ug kita ang mga kompanya sa kuryente, ingon man nga wala usab natuman sa regulatory agencies—sama sa ERC ang ilang reponsibilidad nga i-regulate og maayo ang presyo sa kuryente.
Dugang niini, nga adunay katungod ug mandato ang regulatory bodies nga magpagawas og polisiya aron butangan og limitasyon o cap ang pagsaka sa presyo, apan dili kini kanunay nga gipatuman.
Busa, panawagan niino ang mas hugot ug mas responsableng pagdumala gikan sa mga awtoridad aron mapanalipdan ang interes sa publiko batok sa walay hunong nga pagtaas sa bayronon sa kuryente.
Sa pikas bahin, gipaambit usab ni Cebu City Councilor Joel Garganera nga dako ang matabang sa pag-ugmad sa renewable energy aron matubag ang gikinahanglang 400 megawatts (MW) nga suplay sa kuryente sa dakbayan ug sa tibuok rehiyon.
Sumala ni Garganera, bisan pa man nga nagkinahanglan kini og luag ug dako nga luna sa yuta, apan napamatud-an na sa ubang mga nasod nga epektibo kini ug paspas nga gipatuman.
Gihimug-atan usab sa konsehal nga usa kini sa labing maayong solusyon aron makatabang sa krisis sa enerhiya.
Busa, naglaom kini nga mahingusgan ug mahatagan og pagtagad ang pagpalambo sa renewable energy projects alang sa sigurado ug limpyong enerhiya sa Sugbo.
