Padayon nga kakulangon sa pondo ug mga health worker maoy usa sa mga rason kon nganong dili paspas ang pagtubag sa pag-ulbo sa Ebola sa Democratic Republic of Congo.
Sumala sa World Health Organization (WHO), ang pag-ulbo sa sakit mikaylap na ngadto sa unom ka mga probinsya gikan sa unang naapektuhan nga probinsya sa Bunia sa maong nasud.
Tungod niini, nagtukod ang mga awtoridad og dugang treatment centers nga mas duol sa mga komunidad nga apektado.
Kapin sa 6,000 ka mga tawo ang natakdan ug kapin sa 3,100 ang namatay tungod sa maong pag-ulbo sa sakit, nga giisip na karon nga usa ka Ebola epidemic sa nasud.
Adunay kapin sa 1,400 ka mga treatment beds sa 59 ka mga sentro, apan gikinahanglan pa ang dugang nga 1,600 ka mga higdaanan.
Samtang, gikinahanglan usab ang pag-recruit ug pagbansay sa dugang 5,000 ka mga health worker aron mapalapad ang kapasidad sa mga sentro sa pagtambal.
Base sa mga rekord sa WHO, ang kakulang sa mga internasyonal nga organisasyon nga adunay igong pagbansay sa pagtubag sa Ebola usa ka dakong hagit.
Nanawagan ang WHO sa mga donor nga mohatag og dugang kontribusyon alang sa plano sa Congo nga nagkantidad og 1.3 bilyon ka US dollar aron matubag ang sitwasyon sa sunod nga unom ka bulan.
