Gikonsiderar nga “harmless” o walay dakong epekto ang kinatibuk-ang testimonya ni kanhi Sandiganbayan Presiding Justice Amparo Cabotaje-Tang atol sa nagpadayong impeachment trial batok kang Vice President Sara Duterte.
Kini ang gipasiugda ni Atty. Rameses Victorius Gatchalian Villagonzalo, usa ka International Criminal Court (ICC) accredited lawyer, atol sa pakighinabi sa Bombo Radyo Cebu Newsteam.
Sumala ni Villagonzalo, ang gipadayag sa maong saksi kay mas gipasukad sa iyang kaugalingong opinyon bahin sa mga legal nga hisgutanan ug dili sa tinuod nga mga akusasyon o factual allegations batok sa Bise Presidente.
Dugang niini nga gisusama lamang niya kini sa usa ka diskurso o “lecture” sulod sa classroom nga walay direktang ebidensya.
Apan, gikanayon ni Villagonzalo nga bisan paman kon walay silbi ang maong testimonya kay maisip kini nga ‘stands alone,’ mahimo gihapon kini nga gamiton nga pamasaranan o reference sa prosekusyon kon ugaling adunay ubang mga saksi nga makapamatuod sa mga nahitabong paglapas sa gihisgutang lagda sa impeachment.
