Gikumpirma ni Department of the Interior and Local Government (DILG) Secretary Jonvic Remulla nga ang menor de edad nga suspek sa pagpamusil sa usa ka eskwelahan sa South Cotabato naladlad sa “dark web” ug nag-antos sa depresyon.
Kini nga mga hinungdan giisip nga nag-unang rason sa mga lihok sa estudyante, nga miresulta sa kamatayon sa duha ka kaubang estudyante ug nakaangkon og samad ang gibana-bana nga walo pa nga kasamtangang nagpaalim sa ospital.
Gipasabot ni Remulla nga adunay mga “dark web” site nga natago sulod sa pipila ka mga mobile app nga gidisenyo aron pagdani ug pag-impluwensya sa mga batan-on sa paghimo og mga krimen.
Gihisgutan usab niya ang kasayon sa pag-access sa mga batan-on sa social media karong panahona isip usa ka dakong isyu.
Tungod niini, ang ahensya nakig-alayon sa Department of Information and Communications Technology (DICT) aron limitahan ang access sa mga menor de edad sa social media ug panalipdan sila gikan sa mga indibidwal nga adunay daotang tuyo.
Nanawagan usab siya sa mga ginikanan nga bantayan pag-ayo ang ilang mga anak ug kanunay nga subayon ang ilang mga kalihokan ug interaksyon online.
