Nipadayag si Cabinet Secretary Benhur Abalos sa iyang kinasingkasing nga pagdayeg ug pag-ila sa nagkadaiyang mga grupo ug organisasyon, ilabi na sa Anti-Crime and Community Emergency Response Team o ACCERT tungod sa ilang talagsaong dedikasyon ug propesyonalismo sa pagserbisyo sa nasod atol sa ika-10 nga anibersaryo nga gipahigayon diri sa Sugbo.
Sa maong pahayag, nagkanayon si Sec. Abalos nga aron magmalampuson ang usa ka organisasyon, adunay duha ka importanteng sukaranan nga kinahanglang matuman, ang maayong pagka-organisa ug ang hustong pagbansay, aron magmalampuson ang usa ka organisasyon, una, kinahanglan kini nga organisado. Ikaduha, kinahanglan kini nga adunay hustong pagbansay, ug mapasigarbuhon usab kini mipahibalo nga natuman sa ACCERT kining duha ka aspeto.
Dugang pa ni Abalos nga tungod sa ilang kahapsay ug hugot nga pagbansay sa mga miyembro gikan sa Luzon, Visayas, ug Mindanao, mapasigarbuhon silang giila isip “force multipliers” ug giisip nga mga bag-ong bayani sa panahon nga andam motabang sa tanang bahin sa Pilipinas.
Gipunting usab niini nga kinahanglan nga mahimong mas resilient ang mga komunidad tungod sa kanunay nga pag-atubang sa Pilipinas sa mga linog, bagyo ug uban pang epekto sa climate change.
Busa, gidayeg niya ang mga volunteer organization sama sa ACCERT sa pagtabang sa pagpalapad sa kapasidad sa gobyerno, ilabina tungod kay limitado ang resources sa kapulisan, bombero, medical teams ug disaster response agencies.
