CENTRAL VISAYAS- Uyon ang grupo sa Cebu Electricity Rights Advocate (CERA) sa pagduso sa Regional Development Council-7 (RDC) nga ideklarar sa Palasyo ang Visayas ubos sa State of Power Emergency, kini aron mapaspasan ang mga lakang ug proyekto nga ipatuman, lakip na ang pagsulbad sa problema sa kuryente sa rehiyon.
Matud ni Nathaniel Chua, Convenor sa Cebu Electricity Rights Advocate, nga dako ang ilang pag-uyon sa pagduso sa RDC-7 ngadto sa kagamhanan nga ipaubos sa State of Power Emergency ang Visayas, kini gumikan kay dugay na kining giduso sa grupo hilabi na nga naghinangat na usab ang “Super El Nino” nga posibleng moresulta sa dakong kadaot sa suplay sa kuryente.
Sigon niini, nga kinahanglan na gayud nga ipatuman kini. gumikan kay nagkanihit na ang suplay sa kuryente sa Visayas, hilabi na sa mga Hydro-Power Plants, nga inanay nga naapektohan sa “Super El Nino” nga maoy hinungdan sa pagkabalda sa pagkuha ug suplay sa Visayas gikan usab sa Mindanao.
Giklaro ni Chua, nga ang pagdeklarar sa “State of Power Emergency” dili mamahimong “conflict” sa nauna nang gideklarar sa kagamhanan nga “National Energy Emergency” gumikan kay managlahi kini nga approach, diin ang nauna nagsulbad sa kinatibuk-ang problema sa enerhiya nasud, samtang ang ikaduha naghatag ug kahigayonan nga makapatuman ug makapasulbad sa hingpit nga panginahanglanon sa Visayas.
Dugang niini, nga pinaagi sa deklarasyon mas mapadali ang paghimo og mga lakang aron hingpit nga makunhoran o masulbad ang problema sa suplay sa kuryente, lakip na ang pagpakunhod sa paggamit sa kuryente sa mga pampublikong buhatan ug pag-import og suplay sa enerhiya.
Gihimug-atan usab niini, nga sa padayong gisagubang sa Visayas, angayan lang nga manubag sa kinatibuk-an ang tanan nga parte sa kagamhanan, kini gumikan kay sila ang nahimong representasyon sa katawhan sa pagpatuman og hinanaling solusyon sa problema sa kuryente.
Matud ni Chua, nga adunay kakulangan ang National Grid Corporation of the Philippines (NGCP) sa serbisyo niini, gumikan kay adunay mga pagkalangan ang pagdeliver niini og solusyon ug pagmintinar sa mga transmission lines, nga agig sulbad sa kanihit sa enerhiya.
