Gihangyo sa prosekusyon sa International Criminal Court o ICC nga ibasura ang mosyon sa kampo ni kanhi Presidente Rodrigo Duterte nga limitahan ngadto sa 10,000 ka item ang mga ebidensya nga ipresentar sa iyang kaso nga may kalabotan sa giingong crimes against humanity.
Matod sa prosekusyon, makatarunganon ang gidaghanon sa mga ebidensya ug direktang may kalabotan sa kaso, ilabina sa pagpamatuod sa mga espesipikong insidente ug sa mas lapad nga konteksto sa giingong mga krimen batok sa mga sibilyan.
Gihimakak usab sa prosekusyon ang alegasyon sa depensa nga nahimo kining pamaagi sa “document dumping”.
Sa naunang mosyon, gibutyag sa depensa nga misaka gikan sa 5,275 ka item atol sa yugto sa kumpirmasyon ngadto sa kapin 62,000 ka aytem ang mga ebidensya nga ipresentar.
Naglangkob kini sa kapin 320,000 ka pahina sa mga dokumento ug kapin 1,000 ka audio-visual nga materyales.
Gisugyot sa kampo ni Duterte nga limitahan ngadto sa 10,000 ka item ang rekord sa kaso aron masunod ang gikatakdang petsa sa husay sa Nobyembre 30.
Apan, miinsistir ang prosekusyon nga ang maong limitasyon mahimong makapawala sa mga importanteng ebidensya nga gikinahanglan aron mapamatud-an ang ilang kaso.
Si Duterte anaa karon sa kustodiya sa ICC sa The Hague, Netherlands, samtang ang husay nagpabiling gikatakdang ipahigayon sa Nobyembre 30.
