Masaligon sa ilang kaandam ang kampo ni Vice President Sara Dutertenga nga atubangon ang uban pang mga imbestigasyon, gawas sa nagpadayon nga impeachment trial sa Senado.
Matod pa sa tigpamaba sa Bise Presidente nga si Atty. Paolo Panelo, andam ang legal team ni VP Sara sa pag-atubang sa bisan unsang dugang nga imbestigasyon nga mahimong sugdan sa bisan unsang ahensya o grupo batok kaniya.
Naglakip kini sa mga posibleng imbestigasyon nga motumaw gikan sa mga isyu nga gipadangat atol sa impeachment trial, sama sa mga butang nga may kalabotan sa financial issues.
Gipahayag ni Atty. Panelo nga nagpabilin ang baruganan ni VP Sara nga wala siyay nahimo nga bisan unsang sayop o ilegal nga buhat sa tibuok niyang karera sa serbisyo publiko, gikan sa iyang panahon isip lokal nga opisyal sa Davao hangtod sa iyang kasamtangang papel isip Bise Presidente sa Pilipinas.
Dugang pa niya, andam siyang modawat sa bisan unsang imbestigasyon nga ipahigayon.
Kahinumdoman nga aduna nay mga reklamo sa plunder ug mga kasong kriminal nga gisang-at kaniadto batok sa Bise Presidente kalabot sa mga alegasyon sa iregularidad sa panalapi.
Ang mga pasiunang reklamo nga naglakip sa plunder, bribery, malversation, ug graft—gisang-at sa mga lider sa civil society, mga representante sa simbahan, ug mga academics.
Gisundan kini og dugang nga mga reklamo sa plunder ug mga kasong kriminal nga gisang-at ni kanhi Senador Antonio Trillanes IV.
