Gikumpirma sa Bureau of Internal Revenue (BIR) atol sa impeachment trial ni Vice President Sara Duterte nga ang kinatibuk-ang net income sa Bise Presidente ug sa iyang bana nga si Atty. Manases Carpio mikabat sa P85.34 milyon gikan sa tuig 2007 hangtod 2025.
Kini nga kantidad mas ubos og hapit P13.3 milyon kon itandi sa P98.66 milyon nga net worth nga gideklarar ni Duterte sa iyang 2025 Statement of Assets, Liabilities, and Net Worth (SALN).
Matod ni BIR Chief of Staff Atty. Anne Loraine Garcia-Marquez, nakuha ang maong kantidad gikan sa ilang income tax returns human ikunhod ang mga galastohan ug buhis.
Gikumpirma usab niya nga adunay gi-isyu nga Letter of Authority (LOA) kalabot sa usa sa magtiayon, apan wala siya nagbutyag og dugang detalye tungod sa lagda sa confidentiality.
Atol sa presentasyon sa prosekusyon sa House, gipahayag usab ni Atty. Erwin Matib nga ang net income sa magtiayon dili motakdo sa bahandi nga gideklarar ni Duterte. Giakusahan usab sa prosekusyon ang Bise Presidente nga nagpadayon sa pagpraktis sa pagka-abogado ug pagdawat og professional fees samtang anaa sa katungdanan, base sa mga rekord sa BIR.
Gihisgutan usab sa prosekusyon ang giingong wala gideklarar nga kwarta ug uban pang mga kabtangan nga gipanag-iya sa magtiayon. Base sa mga financial statement nga ilang gipresentar, ang balanse sa kwarta anaa sa P21 milyon niadtong 2022, P28 milyon niadtong 2023, P15 milyon niadtong 2024, ug P13 milyon niadtong 2025.
Apan, wala pa gibutyag sa BIR kung kinsa sa magtiayon ang subject sa LOA, kanus-a kini gi-isyu, o kung aduna bay nakit-an nga mga kakulangan sa pagbayad sa buhis.
