Giplano sa prosekusyon sa International Criminal Court (ICC) nga mopresentar og lima ka saksi sa husay bahin sa mga kasong crimes against humanity batok kang kanhi President Rodrigo Duterte sa dili pa ang Christmas break sa korte.
Matod ni Senior Trial Lawyer Julian Nicholls, ang mga saksi—nga gihatagan og mga protective code—gilaumang personal nga mopatim-aw ug mopamatuod sa The Hague, gawas kon adunay mga wala damha nga problema atol sa mga pagpangandam.
Mahimong mohatag ang mga saksi og live testimony o gamiton ang ilang mga sinulat nga pahayag nga gihimo kaniadto, subay sa Rule 68 sa ICC.
Atol sa status conference, gihisgutan usab ang plano sa prosekusyon nga mogamit og mga open-source material, lakip ang gibana-banang 1,000 ka ginunting nga mga balita gikan sa mga mantalaan bahin sa mga pagpatay sa Davao City sa panahon nga mayor pa si Duterte.
Gipangutana ni Presiding Judge Joanna Korner kon gikinahanglan ba nga ilakip ang tanang maong mga taho sa opisyal nga rekord sa husay.
Gipasabot ni Nicholls nga importante ang mga dokumento tungod kay gitigom kini sa panahon nga walay opisyal nga ahensiya nga sistematikong nagdokumento sa mga giingong extrajudicial killing.
Matod pa niya, mahimong makatabang usab ang maong mga materyales sa pagtino kon unsa ang nahibaloan sa mga opisyal nga nagdumala niadtong panahona.
Samtang, gipadayag sa defense team ni Duterte nga milapas na sa 18,000 ka aytem ang listahan sa mga ebidensiya, lakip ang usa ka dataset nga adunay 8,393 ka aytem gikan sa mga operasyon sa Philippine National Police (PNP) nga gihimo tali sa Hulyo 2016 ug Nobyembre 2017.
Giawhag sa mga maghuhukom ang prosekusyon nga dugang pakunhuran ang gidaghanon sa mga dokumentong nagdoble-doble aron mas mapuntingan sa husay ang mga nag-unang ebidensiya.
