Gipalig-on sa Philippine Red Cross (PRC) ug sa Department of Education (DepEd) ang ilang kooperasyon aron nga mapalambo ang kahibalo mahitungod sa pagpangandam sa kalamidad ug aron madasig ang diwa sa boluntaryong pagserbisyo taliwala sa mga kabatan-onan, ilabi na atubangan sa mga hulga sama sa El Niño.
Kining nagtutok sa pagpalig-on sa mga Red Cross Youth (RCY) club diha sa mga eskwelahan pinaagi sa paghatag og mga pagbansay sa first aid, cardiopulmonary resuscitation (CPR), ug pagpakunhod ug pagdumala sa risgo sa kalamidad, lakip na ang pagpataas sa kahibalo mahitungod sa mental health.
Gipasiugda ni PRC Chairman ug CEO Richard Gordon nga ang maong inisyatiba nagtumong sa paghulma sa mga estudyante nga dili lamang andam nga moluwas og kinabuhi, apan aduna usab inisyatiba sa pag-atiman sa kaluwasan ug kinatibuk-ang kaayohan sa uban.
Gipasiugda usab ni Education Secretary Sonny Angara ang kamahinungdanon sa pag-amuma sa mga lungsuranon nga responsable ug adunay balanse nga pagkatawo—ilabi na sa panahon sa AI, diin gikinahanglan ang pagpabalik sa “human touch” o tawhanong pagtagad ug ang kultura sa pagtinabangay sulod sa katilingban.
Gipasiugda usab ni PRC Secretary-General Dr. Gwendolyn Pang ang mahinungdanong papel sa RCY sa paghubad sa mga mithi sa humanitarianism ngadto sa aktuwal nga aksyon, samtang naghatag og mga oportunidad sa mga kabatan-onan aron mapalambo ang ilang leadership skills.
Pormal nga selyohan sa PRC ug DepEd ang kolaborasyon pinaagi sa pagpirma sa usa ka Memorandum of Agreement (MOA), nga magsiguro sa padayon nga kooperasyon ug kaluwasan diha sa mga eskwelahan sa tibuok nasud.
