Gisaway ni kanhi Department of the Interior and Local Government (DILG) Secretary Rafael Alunan ang kontrobersyal nga mga pahayag ni Chinese Ambassador Jing Quan, nga iyang gihulagway nga agresibo ug walay pagtahod.
Matod ni Alunan, angay mangayo og pasaylo sa publiko si Jing ngadto sa katawhang Pilipino tungod sa iyang mga pahayag.
Kon mapakyas ang embahador sa pagbuhat niini, gisugyot ni Alunan nga pahinumdoman siya ni President Ferdinand Marcos Jr. bahin sa hustong pamatasan ug pagtahod sa nasod nga iyang giestaran isip diplomat.
Kahinumdoman nga nagpahayag kaniadto si Marcos nga mahimo niyang ipatawag ang embahador sa China agig tubag sa kontrobersyal nga mga pahayag niini.
Dugang pa ni Alunan, angay badlongon sa Presidente si Jing tungod sa mga pulong nga giisip niyang pagpanghadlok, nga gipahayag sa embahador samtang anaa siya sa teritoryo sa Pilipinas.
Gisugyot usab sa kanhing kalihim ang pagpalagpot kang Jing isip embahador sa China sa Pilipinas.
Dugang pa, girekomendar ni Alunan nga pabalikon sa Pilipinas ang iyang embahador gikan sa China ug ikonsiderar ang pagpaubos sa lebel sa diplomatikong relasyon tali sa duha ka nasod.
Matod niya, ang mga lihok sa Chinese Communist Party nagpakita og dakong kawalay pagtahod sa Pilipinas.
