Gisuportahan ni Agriculture Secretary Francisco P. Tiu Laurel Jr. ang sugyot nga ideklarar ang State of Calamity aron mapadali ang pagpagawas sa pondo sa gobyerno ug ang paghatag og tabang sa mga apektado sa El Niño.
Gipaluyohan ni Laurel ang sugyot ni Senador Francis Pangilinan human nagpasidaan ang PAGASA nga posibleng mograbe ang init nga panahon ug mosangpot sa kusog nga Super El Niño.
Matod sa kalihim, kinahanglan molihok dayon ang gobyerno aron mapanalipdan ang panginabuhian sa mga mag-uuma ug masiguro ang suplay sa pagkaon, imbes nga maghulat pa nga modako ang kadaot sa agrikultura.
Matod ni Pangilinan, ang deklarasyon makatabang sa pagpadali sa pagpagawas sa pondo ug pagpatuman sa mga lakang sa pagtubag sa krisis sa mga apektadong rehiyon.
Gibanabana sa Department of Agriculture (DA) nga posibleng maapektuhan ang 4.6 ka milyon ka mag-uuma ug mangingisda.
Gipasidan-an usab sa ahensiya nga mahimong mokunhod ang produksyon sa bugas kon magpadayon ang grabeng hulaw.
