Nanawagan pag-usab si United Nations Secretary-General António Guterres sa Iran ug Estados Unidos nga tapuson ang ilang panagbangi ug likayan ang dugang nga pag-usbaw sa tensiyon.
Gipasiugda ni Guterres ang kamahinungdanon sa pagpugong sa kaugalingon ug pagpangita og malinawon nga solusyon pinaagi sa dayalogo ug diplomasya.
Gipasidan-an usab niya nga kon mosangpot sa mas dakong komprontasyon sa militar ang nagkagrabeng tensiyon tali sa duha ka nasud, posibleng mograbe ang krisis ug mokaylap ang epekto niini lapas sa Middle East.
Gipasiugda usab sa lider sa UN nga kinahanglang hingpit nga mapasig-uli ang kagawasan ug katungod sa paglawig subay sa internasyonal nga balaod sa Strait of Hormuz ug Bab el-Mandeb Strait, nga mahinungdanong mga agianan sa pangkalibotang patigayon.
Gidayeg usab ni Guterres ang Egypt tungod sa padayon nga paningkamot niini sa pag-abli sa mga agianan alang sa dayalogo ug diplomasya tali sa Iran ug Estados Unidos.
Gipahayag niya kini atol sa iyang pagbisita sa Cairo, Egypt, Lunes, Oktubre 26, diin iyang gipasiugda ang panginahanglan sa pagpadayon sa mga paningkamot sa diplomasya aron malikayan ang mas dakong panagbangi sa rehiyon.
