Midepensa ang Philippine Air Force (PAF) batok sa mga pagsaway ug pagduda nga karaan na ang ilang mga SF-260 training aircraft human sa usa ka trahedya sa kahanginan sa Fernando Air Base sa Lipa City, Batangas.
Matod sa tigpamaba sa PAF nga si Col. Alvin Jay Capinguian, ang maong mga eroplano gipalit tali sa 2010 ug 2011 ug aduna pay pipila ka tuig nga magamit pa.
Gipasabot ni Capinguian nga ang airworthiness o ang kapasidad sa usa ka eroplano sa paglihok ug paglupad gitimbang-timbang base sa kinatibuk-ang gidaghanon sa oras nga gigamit kini sa paglupad (flight hours), ug dili lang base sa gidugayon sa panahon sukad kini gipalit.
Tungod sa maong insidente, pormal nga gipagawas ang mando nga temporaryong dili una palupadon o i-ground ang 15 ka uban pang mga eroplanong SF-260 samtang nagpadayon pa ang gihimong opisyal nga imbestigasyon.
Kahinumdoman nga tulo ka adlaw ang nakalabay, upat (4) ka mga piloto sa Air Force ang nakabsan sa kinabuhi human nagbangga ang duha ka eroplanong SF-260 samtang nagpahigayon og training flight sa kahanginan sa Batangas.
