Dili momenos sa 15 ka mga panimalay ang hingpit nga naugdaw human miulbo ang sunog sa Sitio Tac-an, Barangay Budlaan, Dakbayan sa Sugbo, niadtong Biyernes, Oktubre 30, 2026, mga alas 7:29 sa buntag.
Daling miresponde ang mga sakop sa Cebu City Fire Station ug nagpadala og mga 10 ka fire truck, pasado alas 7:40 sa buntag.
Matod ni Senior Fire Officer 3 Wendell Villanueva, ang tigpamaba sa Cebu City Fire Station, nagsugod ang sunog sa balay sa usa ka residente nga giilang si Jeffrey Tradio, una kini mikaylap ngadto sa mga silingang balay.
Nakontrolar sa mga bombero ang sunog pasado alas 8:04 sa buntag ug hingpit kining napawong sa alas 8:36 sa buntag.
Gipasabot ni Villanueva nga ang sunog gituohang nagsugod sa usa ka electrical issue tungod sa kainit, nga maoy hinungdan sa paspas nga pagkatap sa kalayo ngadto sa mga balay nga ginama sa mga light materials.
Gibanabanang moabut sa ₱300,000 ang kantidad sa kadaot, samtang wala hinouy gitaho nga naangol o namatay sa maong insidente.
