Gisuspinde sa Department of Transportation (DOTr) ang Passenger Ship Safety Certificate (PSSC) sa MV OceanJet 788 human kini mabangga sa loading dock sa Tagbilaran Port sa Bohol niadtong Sabado, Oktubre 31.
Sumala ni Transportation Secretary Vince Dizon, gimandoan sa Maritime Industry Authority (MARINA) ang suspensyon aron masiguro nga ang mga barkong nagbiyahe sa kadagatan luwas ug nagsunod sa mga sumbanan sa kaluwasan.
Tungod niini, temporaryong dili tugotan nga mobiyahe ang maong fastcraft hangtod nga makapasar kini sa safety inspection sa MARINA.
Matod ni Dizon, prayoridad sa gobyerno ang kaluwasan sa mga pasahero, ilabina karong Undas diin gilauman ang pagdaghan sa mga biyahero.
Gipasiugda usab niya nga dili tugotan nga magpadayon sa operasyon ang bisan unsang barko nga wala makatuman sa mga kinahanglanon sa kaluwasan.
