CENTRAL VISAYAS- Malinawon nga nahuman ang pagsaulog sa Kalag-kalag 2026 sa tibuok Central Visayas, diin walay natala nga krimen atol sa pinakadaghan nga pagbisita sa mga sementeryo niadtong Nobyembre 1 ug 2.
Wala usab natala nga mga bata nga nawala o mga insidente sa pagpangawat atol sa maong selebrasyon.
Sa pakighinabi sa Bombo Newsteam kang Police Lieutenant Colonel Rolan Aliser, tigpamaba sa Police Regional Office 7 (PRO-7), matud niini, nga nakatampo pag-ayo sa malinawon nga pagsaulog ang hiniusang paningkamot sa kapulisan, traffic enforcers, force multipliers, City Disaster Risk Reduction and Management Office (CDRRMO), Bureau of Fire Protection (BFP), ug uban pang ahensya.
Gipasiugda usab niya nga dako ang nahimong papel sa mas hugot nga police visibility sa nagkadaiyang mga sementeryo ug mga lugar nga giduaw sa daghang tawo, subay sa direktiba sa Regional Director.
Nakigtambayayong usab sa seguridad ang Philippine Coast Guard ug ang Bureau of Jail Management and Penology (BJMP) sa tibuok rehiyon.
Samtang, gipahibalo niini nga gipabalik na sa ilang tagsa-tagsa ka estasyon karong Nobyembre 3 ang mga pulis nga gipakatap sa mga sementeryo ug ubang lugar nga gipaabtan sa daghang tawo.
May kalabotan sa dungan nga pagpahigayon sa ASEAN 2026 ug Kalag-kalag 2026, gipadayag ni Aliser nga sukad pa sa pagsugod sa mga kalihokan sa ASEAN, wala nay gitugot nga leave o absent alang sa mga personnel sa kapulisan.
Apil usab sa gipakatap ang mga personnel sa opisina aron masiguro ang igo nga puwersa sa seguridad sa nagkadaiyang kalihokan.
Matod pa niya, dugay nang gipangandaman sa kapulisan ang maong mga kalihokan, bisan pa man sa kakapoy ug kakulang sa pahulay tungod sa sunod-sunod nga pagdeploy.
Bisan pa niini, giingon ni Aliser nga nahimong mapuslanon ang ilang kahago tungod sa malampuson ug malinawon nga pagpahigayon sa mga kalihokan, nga walay natala nga dili maayong insidente.
