Hugot nga gipanghimakak sa Bureau of Jail Management and Penology (BJMP) ang mga alegasyon nga nakalusot o nakagawas si kanhi House Speaker Martin Romualdez gikan sa Quezon City Jail-Male Dormitory.
Matod sa tigpamaba sa BJMP nga si JSupt. Jayrex Bustinera, basi sa mga kuha gikan sa Closed-Circuit Television (CCTV), anaa pa sa sulod sa pasilidad si Romualdez niadtong Nobyembre 4.
Dugang pa niya nga walay nahitabong pagkaputol sa kuryente nga makabalda unta sa operasyon sa CCTV system.
Gisusi pag-ayo sa BJMP ang CCTV system ug gikumpirmar nga naglihok kini sa hingpit, ug walay mga lihok nga wala narekord.
Kining pamahayag gikan sa BJMP nagsilbing tubag sa mga pasangil nga ang maong magbabalaod migawas sa pasilidad agi sa hagdanan sa likod, diin ang mga CCTV camera sa maong dapit giingong gipalong aron dili makuha sa rekording ang iyang mga lihok.
Giklaro ni Bustinera nga walay agianan o gawas sa likod nga bahin sa pasilidad; usa lang ang ganghaan niini, nga nahimutang sa atubangan.
Samtang, gimandoan ni BJMP Chief JDIR Efren Nemeño ang usa ka lawom nga imbestigasyon bahin sa alegasyon nga si Romualdez giingong nakagawas sa pasilidad niadtong Nobyembre 3.
