Gipasalig sa National Food Authority (NFA7) nga igo ang buffer stock sa bugas sa central visayas, busa wala pa gilaum nga motaaas ang presyo sa bugas hangtod disyembre 31, 2026.
Samtang, gipahugtan sa Department of Trade and Industry o DTI 7 ang pagmonitor sa suplay ug presyo sa mga batasang palitunon, ilabi na ang mga sudlanan sa tubig, tungod sa hulga sa El niño.
Matod ni DTI-7 Supervising Trade and Industry Development Specialist Marilyn Tancinco, sukad Oktubre 19, 2026 gisugdan nila ang specialized monitoring sa mga sudlanan sa tubig.
Gitan-aw sa ahensya ang gidak-on, presyo ug stock sa mga water containers sa mga tindahan, bodega ug water refilling stations.
Gipahinumdoman usab sa DTI 7 ang publiko nga mopalit lamang sa gikinahanglan ug likayan ang panic buying, aron dili maapektuhan ang suplay para sa ubang konsumidor.
Samtang, gipasalig sa NFA 7 nga igo ang ilang buffer stock sa bugas aron matubag ang panginahanglan sa Central Visayas.
Sa pagkakaron, mokabat sa 47,054 ka sako sa bugas ang stockpile sa NFA sa rehiyon.
Anaa niini ang 41,704 ka sako sa Cebu, 4,131 sa Bohol, 620 sa Negros Oriental ug 599 sa Siquijor.
Matod ni NFA 7 Acting Regional Manager Liza Balagot, nagpadala na sila og dugang nga mga kargamento sa bugas gikan sa mga lugar nga adunay surplus aron mapalig-on ang lokal nga reserba.
Nagpadayon usab ang NFA sa pagpalit og lokal nga humay, lakip ang koordinasyon sa mga local government units ug mga magbabalaod.
Gilauman pa sa ahensya ang dugang nga rice shipments aron mapadayon ang igo ug hapsay nga pag-apod-apod sa bugas samtang nagpadayon ang ting-init.
Samtang, mipasalig ang DTI 7 nga magpadayon ang ilang price ug supply monitoring hangtod Disyembre 31, 2026, aron maseguro nga stable ang presyo ug igo ang suplay sa mga batakang panginahanglanon.
