Gikatakdang mobisita ang Hollywood Icon nga si Angelina Jolie, sa nasud isip usa sa mga mamumulong sa 2026 ASEAN Inclusive Growth Summit, nga ipahigayon karong Nobyembre 11.
Mahimong usa sa mga nag-unang mamumulong sa maong kalihokan, ang Academy Award-winning actress diin motambong ang mga representante gikan sa nagkalain-laing sektor aron hisgutan ang ekonomiya sa Southeast Asia.
Si Jolie ilado sa iyang mga adbokasiya alang sa katawhan, hilabi na ang iyang mga kampanya alang sa pagpanalipod sa mga kababayen-an ug kabataan, ingon man ang iyang mga paningkamot alang sa mga refugee.
Gikan sa 2001 hangtod 2012, ang Hollywood actress nagsilbi isip Goodwill Ambassador alang sa United Nations High Commissioner for Refugees (UNHCR) sa wala pa siya gitudlo isip Special Envoy.
Apil si Jolie sa ubang mga inila nga personalidad nga mamulong sa summit, lakip na ang theater actress ug nakadaog og Tony Award nga si Lea Salonga, Rajo Laurel, Kylie Verzosa, ug ang Kalihim sa Department of Trade and Industry nga si Cristina Roque.
