Dili pa makahatag og lig-on ug makakombinsir nga presentasyon ang kampo sa depensa ni Vice President Sara Duterte human sa unang adlaw sa pagpresentar niini sa ilang mga testigo, sumala ni Atty. Jojo Lacanilao, Lead Convenor sa Duterte Panagutin Network, kanhi diplomat ug practicing lawyer.
Matud ni Lacanilao, sa pakighinabi sa Bombo Newsteam nga gilauman niyang mas lig-on ang unang presentasyon sa depensa, ilabina kay seryoso ang mga alegasyon nga ilang kinahanglang tubagon.
Apan, sumala kaniya, napakyas sa paghatag og maayong unang impresyon ang unang testigo nga si Assessor Jaime Alajina tungod sa mga pangutana nga wala niini matubag og klaro, lakip na ang pipila ka detalye nga may kalabotan sa iyang kredibilidad isip testigo.
Dugang pa ni Lacanilao, isip city assessor, gilauman nga batid si Alajina sa mga detalye kabahin sa mga yuta ug propiedad, lakip na ang ilang tag-iya ug classification.
Gikuwestiyon usab niini ang kapakyas sa testigo sa paghinumdom sa pipila ka detalye sa iyang biyahe sa China niadtong Enero ning tuiga.
Sa laing bahin, giila ni Lacanilao nga adunay mga punto nga mahimong magamit sa depensa aron ipakita ang mga kakulangan sa presentasyon sa prosekusyon, ilabina sa pagpatin-aw sa valuation ug mga dokumento sa propiedad.
Apan, kinahanglan pa usab nga matubag sa kampo sa depensa ang mga alegasyon kabahin sa mga propiedad nga wala kuno maapil sa Statement of Assets, Liabilities and Net Worth o SALN, ingon man ang mga kalainan sa mga kantidad nga makita sa nagkalainlaing dokumento.
