-- ADVERTISEMENT --

Determinado ang Southern Police District (SPD) nga pasakaan og kaso ang kapin sa 200 ka mga indibidwal nga gidakop tungod sa pagpahigayon og ilegal nga protesta.

Matod ni SPD Director, Police Brigadier General Rodel Pastor, ang mga indibidwal gidakop sa Sucat People’s Park sa Muntinlupa City, gahapong adlawa, dungan sa pagsugod sa ika-49 nga ASEAN Summit.

Gisakay sila sa tulo ka mga trak sa Philippine National Police ug gidala palayo. Diin kadaghanan sa mga gidakop mga miyembro sa grupong ‘Timog Katagalugan.

Nahitabo ang kagubot dihang nagdumili ang mga nagprotesta sa pagkooperar sa kapulisan aron masiguro nga malinawon ang demonstrasyon.

Dugang pa ni Pastor nga wala nagtinabangay ang mga nagprotesta sa hapsay nga paagi, ug nakig-ilog pa gani sila sa mga awtoridad.

-- ADVERTISEMENT --

Giklaro niya nga ang kapulisan nagtuman lamang sa ilang mga katungdanan sa hustong paagi.

Nakig-alayon na unta ang kapulisan sa grupo kaniadto, apan namugos ang mga nagprotesta nga ipadayon ang ilang demonstrasyon ug magpahigayon og programa diha sa kadalanan.

Pipila sa mga nagprotesta nga nakasinati og pagkalipong tungod sa kagubot ang gidala sa ospital.

Ang mga gidakop temporaryong gidala sa hedkuwarter sa National Capital Region Police sa Camp Bagong Diwa, Taguig City.

Ang grupo nagprotesta batok sa pagpatuman sa “Pax Silica Initiative” ug “Luzon Economic Corridor” dinhi sa Pilipinas.

Dugang pa, misupak usab ang grupo sa pagbisita ni U.S. President Donald Trump, kinsa mitambong sa ika-49 nga ASEAN Summit.