Giawhag sa Department of Agriculture – Philippine Rice Research Institute (DA-PhilRice) ang matag Pilipino nga aktibong makiglambigit sa pagpalig-on sa industriya sa humay ug bugas sa nasud, atol sa pagsaulog sa National Rice Awareness Month sa Rizal Park, Manila.
Sumala ni DA-PhilRice Los Baños Director Rhemilyn Z. Relado-Sevilla, ang seguridad sa pagkaon wala lamang nagsalig sa gidaghanon sa abot sa mga mag-uuma, kondili nag-agad usab sa responsableng pamatasan sa pagkonsumo sa publiko.
Gihimug-atan niya nga ang yano nga mga lakang, sama sa paglikay sa pag-usik sa kan-on, pagpalit og lokal nga ani sa atong mga mag-uuma, ug pagpili sa mga masustansyang klase sa bugas, dakog ikatabang aron magpabiling igo ug lig-on ang suplay sa bugas sa tibuok Pilipinas.
Ubos sa pagpangulo ni OIC Deputy Executive Director Henry Corpuz, gipaila usab sa maong programa ang nagkadaiyang masustansyang alternatibo sa puti nga bugas, sama sa brown, itom, pula, low-glycemic, ug high-zinc rice, aron matubag ang mga panginahanglanon sa nutrisyon sa publiko.
Usa sa mga nahimong sentro sa ika-24 nga Ceremonial Rice Harvesting mao ang 300-square-meter nga “Rice Garden,” diin mismo ang mga tinun-an ug mga residente sa siyudad ang nakasinati sa mano-mano nga pag-ani og humay kauban ang mga opisyal gikan sa nagkalain-laing kaabag nga ahensya.
Dugang pa sa DA-PhilRice, ang pagkab-ot sa tinuod nga seguridad sa pagkaon dili lamang tahas sa mga mag-uuma, kondili usa ka hiniusang responsibilidad sa matag konsumidor pinaagi sa paghatag og bili ug maalamong paggamit sa matag lugas sa bugas.











