-- ADVERTISEMENT --
Napugos sa paghimo og emergency landing ang Air Niugini Flight PX019 sa Davao International Airport sa kaadlawon karong Sabado, Nobyembre 21, 2026, sumala sa Civil Aviation Authority of the Philippines (CAAP).
Base sa mga taho, mibiyahe ang maong eroplano gikan sa Hong Kong ug padulong unta sa Port Moresby, Papua New Guinea, sa dihang kinahanglan kining motugpa sa Davao.
Gikompirmar sa CAAP nga luwas ang tanang 146 ka mga tawo nga sakay niini nga gilangkoban sa 137 ka mga pasahero ug siyam (9) ka mga tripulante ug walay nataho nga naangol o kaswalti.
Padayon karon ang pagmonitor ug pag-atiman sa mga awtoridad sa kahimtang sa mga pasahero ug sa eroplano human sa malampusong pagtugpa niini.











