Mitaliwan na sa edad nga 46, Ang kanhi PBA star nga si Peter June “PJ” Simon.
Human nga kalit siyang nawad-an sa panimuot atol sa usa ka exhibition game sa Davao City niadtong adlawng Biyernes, Nobyembre 20.
Gikataho, nga human siya milingkod aron mopahulay sulod sa pipila ka minuto, kalit siyang nawad-an sa panimuot.
Gidali siya pagdala sa San Pedro Hospital sa Davao City apan gideklarar nga dead on arrival.
Nailhan sa mga angga nga “The Scoring Apostle” ug “SuperSub,” migahin siya og 17 ka season uban sa prangkisa sa Purefoods sa PBA, diin nakadaog siya og walo ka kampiyonato.
Apil niini ang 2014 Grand Slam, nga nakab-ot niya sa wala pa siya miretiro gikan sa propesyonal nga pagdula niadtong 2020.
Lumad nga taga-Makilala, North Cotabato, nagdula siya alang sa Davao Eagles sa wala pa siya misulod sa PBA niadtong 2004. Nahimo siyang All-Star sa walo ka higayon, ug ang iyang numero sa jersey—numero 8—giretiro sa iyang team isip pasidungog kaniya.
Bisan human siya miretiro gikan sa PBA, nagpabilin siyang aktibo sa basketball sa Mindanao; niadtong 2024, gidumala niya ang regional program sa Pilipinas Super League, nga nagsuporta sa mga batan-on nga adunay dakong gugma alang sa maong duwa.











