Nagpadayon ang search and rescue operations sa usa ka pabrika sa kendi sa Banten, Indonesia, human miulbo ang sunog niadtong Sabado sa gabii.
Matod sa kapulisan, 24 ka mga patayng lawas na ang nakuha gikan sa lugar, samtang anaa sa 30 ka mga tawo ang wala pa mahibaloan ang nahimutangan.
Gibanabanang anaa sa 300 ka mga empleyado ang anaa sa sulod sa pabrika sa dihang nahitabo ang insidente.
Tungod sa kakusog sa sunog, dili na mailhan ang mga patayng lawas, hinungdan nga gikinahanglan ang DNA testing aron matino ang ilang pagkatawo.
Ang mga operasyon sa pagpangita ug pagluwas gikatakdang ipadayon karong Lunes sa buntag; apan, ang mga paningkamot gibabagan sa risgo nga ang pipila ka bahin sa naguba nga bilding mahimong mahugno.
Ang mga awtoridad nagkuha usab og mga sample sa DNA gikan sa mga paryente sa mga trabahante nga nawala. Ang proseso sa pag-ila sa mga biktima gilaumang molungtad og duha ngadto sa tulo ka semana.
Samtang, ang CEO sa kompanya nga si Steven Wijaya, nagpadayag sa iyang pahasubo ug nangayo og pasaylo ngadto sa mga empleyado ug mga pamilya nga naapektuhan sa trahedya, samtang nagpadayon ang imbestigasyon sa mga awtoridad bahin sa hinungdan sa sunog.











