Gihimakak sa abogado sa gipangita karon nga si kanhi Bamban Mayor Alice Guo nga namakak siya sa nahimutangan sa iyang kliyente.
Sa usa ka pamahayag, ang legal counsel ni Guo nga si Atty. Stephen David nga sa tanan niyang pakighinabi sa media, makanunayon siyang niingon nga nagdepende lang siya sa gisulti sa iyang kliyente ug gisubli niya ang deklarasyon ni Guo nga nia pa siya sa Pilipinas.
Bisan tuod giangkon ni Atty. David nga dili niya makompirmar ang maong impormasyon ug wala siya’y ideya kon asa ang gitaktak nga mayor.
Matod niya nga nagdepende lang siya sa representasyon ug pagbutyag sa iyang kliyente, busa misalig siya sa kamatinud-anon ug tukma sa impormasyon nga gihatag kaniya aron depensahan ug mapanalipdan ang katungod sa iyang kliyente.
Gipasabot pa ni Atty. nga sa iyang paghimo sa maong mga pamahayag, si Guo wala’y travel records sama sa mga selyo sa iyang pagsulod sa ubang nasud, fingerprints o CCTV footage, mao nga wala siya’y rason nga magduda sa pamahayag ni Guo.
Gihimo ni Atty. ang maong pagklaro human ang pipila ka mga opisyal niingon nga posibleng mag-atubang og kaso tungod sa iyang mga pamahayag.
Kahinumduman usab nga si Justice Secretary Jesus Crispin Remulla niingon nga ilang susihon ang posibilidad nga dunay kalambigitan ang mga legal counsel ni Guo sa iyang paglayas sa nasud.
