Gipapas ni Armed Forces of the Philippines Chief of Staff General Romeo Brawner Jr. ang kahadlok sa publiko sa posibleng gubat taliwala sa nagkataas nga tensyon sa West Philippine Sea.
Matud pa sa hepe sa AFP nga wala’y angay ikabalaka tungod kay ilang gihimo ang tanan aron malikayan ang gubat subay sa direktiba ni Presidente Ferdinand Marcos Jr.
Dugang niini nga himuon usab sa Armed Forces ang tanang posibleng lakang ug aksyon aron mapugngan kini tungod kay kung adunay gubat, pildi ang tanan ug walay modaog, Pilipinas man o mga higanteng nasud.
Sa samang higayon, ang mga katungod sa soberanya sa nasud padayon nga gihingusgan sulod sa exclusive economic zone.
Ang kadagkoan sa AFP mihimo niini nga pasalig taliwala sa mga fake news nga nikatap sa internet nga ang tensyon sa gilalisan nga kadagatan mahimong mosangpot sa gubat.
Kini nunot sa bag-o lang nga mas agresibong aksyon sa mga personahe sa China Coast Guard batok sa PH troops samtang nagpahigayon og resupply mission sa Ayungin shoal niadtong Hunyo 17 diin pipila ka mga Navy personnel ang naangol sa maong insidente.
