Gidominar sa Filipina tennis star nga si Alex Eala ang iyang duwa batok sa Paris Olympics silver medalist nga si Donna Vekic sa nagpadayon nga Kooyong Classic sa Melbourne, Australia.
Ang torneyo usa ka eksklusibo, by-invite exhibition tournament nga gitambongan sa mga inilang tennis star sa wala pa ang gikatakdang Australian Open.
Gipildi ni Eala kaniadto si Vekic sa bag-o lang natapos nga ASB Classic sa Auckland sa iskor nga 4-6, 6-4, 6-4. Sa pinakabag-o nga duwa, wala kini nakaabot sa deciding set human sa dominanteng performance ni Eala, 6-3, 6-4.
Karong tuiga, nakadaog si Eala og upat sa iyang lima ka singles matches sa wala pa ang iyang gipaabot nga Australian Open.
Samtang, sila si Eala ug Vekic gikatakda nga moapil sa WTA125 Philippine Women’s Open karong bulana.
Bisan pa, dili pa sigurado kung magkita pag-usab ang duha sa nahisgutang torneyo.
