NAGA CITY, CEBU-Nasikop sa mga sakop sa National Bureau of Investigation – Central Visayas Regional Office (NBI-Cevro) ang usa ka lalaki kinsa gitug-an sa mga awtoridad nga nanamastasan sa iyang 16-anyos nga dalagitang anak-anak (stepdaughter) sa Barangay Colon, dakbayan sa Naga sa habagatang Sugbo niadtong Dominggo, Pebrero 2, 2025.
Giila lang ang dinakpan sa alyas nga “Bernardo”, 27-anyos, drayber sa usa ka hardware store kinsa maoy ama-ama (stepfather) sa biktima nga gitugyan nga sulod na sa duha (2) ka tuig ka kini niyang ginahilabtan sa higayong mulakaw padulong sa trabaho ang kapuyo niini (inahan sa biktima).
Ang nakapa-aghat sa biktima nga mutug-an sa maong pagpanghilabot kaniya kay niadtong diay alas 4 sa buntag sa adlaw nga Dominggo ang pinakabag-o nahitabo diin misumbo na ang dalagita sa iyang apohan.
Diri na nahinayak ang lola sa biktima nga misumbong sa mga kawani sa NBI-Cevro og daling nagpahigayon sa ilang operasyon ang mga ahente uban sa pakig-alayon niini sa mga kapulisan sa dakbayan sa Naga, social worker sa DSWD-7, ug mga opisyales sa barangay sa pagtumbok sa suspek.
Apan sa dihang gironda na kini kay daling miikyas ang suspek og nagtago-tago sa mga awtoridad nga nakapa-aghat sa usa ka hot pursuit operation sa at-large nga dakponon sa lugar.
Sa dihang pipila ka oras ang milabay og mibalik kini sa ilang panimalay hinungdan nga nadakpan na kini nga nasayran pang adunay samdan sa agtang ug liog.
Sa pakigsuta sa mga awtoridad, ang mga samad naangkon diay niini kay resulta sa pagsuway og kutlo sa kinabuhi gamit ang pagpusil sa iyang agtang sa kalibre .22 nga pistola ug pagbigti sa liog apan napakyas kini siya.
Gidali kini sa mga awtoridad sa tambalanan aron mapadayon ang pagproseso sa mga krimeng nabuhat niini subay sa mga lagda sa balaod.
Kasamtangang anaa na sa kustodiya sa NBI-Cevro ang dinakpan nga posibling mag-atubangan kini sa kasong qualified rape, child abuse, illegal possession of firearms, ug kalapasan sa Comelec gun ban.
Samtang ang biktimang dalagita kay gipaubos og medico legal, guidance and supervision sa mga representate sa DSWD tungod sa balig duha ka tuig sa pag-antos sa krimeng ginabuhat sa iyang ama-ama batok kaniya.
