Gibuhi pag-usab sa administrasyon ang pagpasiugda sa kontrobersyal nga Anti-Political Dynasty Act ug ang reporma sa Party-list system human kini gilakip sa listahan sa mga prayoridad nga balaodnon karong tuiga.
Basi sa report sa Department of Economy, Planning and Development (DEPDev), ang nahisgutang mga reporma sa politika nalakip sa 21 ka balaodnon nga giaprobahan sa Legislative-Executive Development Advisory Council (LEDAC).
Gawas sa mga pagbag-o sa sistema sa politika, gipasiugda usab ang panginahanglan sa pagpasar sa Anti-Fake News and Digital Disinformation Act.
Kini nga balaod nagtumong sa pagsilot sa mga indibidwal sa luyo sa pagpakatap sa malisyoso ug bakak nga impormasyon nga giisip nga hulga sa nasudnong seguridad.
Samtang, maayong balita alang sa mga magpapanaw ang gisugyot nga pagwagtang sa travel tax.
Apil usab sa gikasabutan nga listahan ang paglangan sa labing una nga Parliamentary Elections sa BARMM.
Apil usab sa prayoridad ang pag-usab sa mga balaod nga manalipod sa mga batan-on, labi na ang Anti-Online Sexual Abuse or Exploitation of Children (OSEAC) ug Anti-Child Sexual Abuse or Exploitation Materials (CSAEM) Act.
Sumala sa DEPDev, kini nga mga lakang importante aron mabalik ang pagsalig ug suporta sa publiko sa mga palisiya sa kasamtangang administrasyon.
