Gidepensahan ni Mayor Nestor Archival ang kagamhanan sa syudad sa Sugbo batok sa mga pasangil nga gipasagdan niini ang dul-an usa ka libo ka mga job order (JO) nga mga trabahante nga sulod sa pipila ka bulan nga wala makadawat sa ilang suweldo, dungan sa pagpasalig nga kompleto ug anaa ang pundo sa syudad.
Matod pa ni Archival, ang nalangan nga mga suweldo nagagikan sa bureaucratic bottlenecks, ilabi na ang kulang nga mga dokumento ug ang ulahi nga pagsumite sa mga report nga gikinahanglan para sa pagproseso sa payroll.
Kini nga depensa giluwatan human gipakita sa mga rekord sa City Council nga labing menos 956 ka mga JO nga trabahante ang nagpabiling wala pa masuweldohan sa ilang serbisyo gikan sa Enero hangtod Marso ning tuiga nga 2026. Ang maong taas nga kalangan nagdala og dakong kabalaka sa kaepektibo sa kagamhanan ug nagbilin sa ginatos ka mga pamilya nga nagkalisod tungod sa kawalan sa kita.
Atol sa gihimo nga press conference niadtong Lunes, Hunyo 1, gisaysay ni Archival nga personal niyang gisusi ang maong isyu human makadawat og mga report mahitungod sa nalangan nga mga suweldo. Matod niya sa tinuod lang iyang gitan-aw kung unsa ang problema tungod kay daghan kaayo og mga hinungdan o factors.
Gitumbok sa mayor ang kalangan sa pagsumite sa mga accomplishment report, nga usa sa mga nag-unang rekisitos sa dili pa maproseso ang mga suweldo. Gipasabot niya nga angay unta nga maghimo na og report gikan sa unang adlaw hangtod sa ika-15 nga adlaw, apan ang kadaghanan dili dayon maghimo ug magpaabot pa sa petsa 15 o petsa 30.
Dugang pa kang Archival, mohinay ang pagproseso sa payroll kung adunay bisan usa lang ka dokumento nga kulang, tungod kay kinahanglan pa nga hulaton sa mga buhatan ang tanang rekisitos sa dili pa mopadayon. Iyang gipasabot nga kung pananglitan adunay usa ka gatos ka tawo, unya adunay usa nga ma-delay, hulaton gyud kini.
Gitinguha usab niya nga ipasabot nga ang kagamhanan sa syudad naggahin na og pundo para sa mga suweldo ug andam kining magpagawas sa bayad sa higayon nga makompleto na sa mga trabahante ang gikinahanglang mga papel. Gipasalig niya nga wala nagkulang ang syudad ug anaa na ang budget, ug sa higayon nga kompleto ang papel, mahatag gyud kini.
Ang katin-awan ni Archival niluwat pipila ka bulan human gibutyag ni Cebu City Councilor Harold Kendrick Go nga 956 ka mga JO nga trabahante ang wala pa makadawat sa ilang mga suweldo gikan sa Enero hangtod Marso 2026, diin ang uban nga na-atrasaw nga suweldo nagsugod pa gani niadtong Oktubre 2025.
