Nanawagan ang bag-ong interim Prime Minister sa Nepal nga si Sushila Karki sa mga lungsuranon niini nga magpabiling kalmado.
Kini human sa mapintas nga mga protesta nga nagbilin sa labing menos 72 ka mga tawo nga namatay ug gatusan ang naangol.
Dugang niini nga kinahanglan usab nga dunggon sa mga opisyal sa gobyerno ang tingog sa mga kabatan-onan.
Gipulihan ni Karki si KP Sharma Oli, kinsa ni-resign tungod sa niulbong grabeng kagubot.
Diin ang 73-anyos nga kanhi justice chief miingon nga ang mga gipangayo sa mga nagprotesta hinungdanon ug naglakip sa pagtapos sa korapsyon, maayong pagdumala ug pagtubo sa ekonomiya busa angayan lang kini nga paminawon ug hatagan og pagtagad.
Gipasalig niya nga ang gobyerno mohatag usab hangtod sa $11,300 sa mga napatay sa mga protesta.
Nagsugod ang mga protesta sa Nepal pagkahuman gidili sa gobyerno ang social media.
