CEBU CITY- Malipayon nga gipahibalo sa local nga kagamhanan sa Sugbo nga wala’y dakong insidente ang nareport sa dakbayan bisan pa sa pag-agi sa Bagyong Basyang, kagahapon, Enero 6, 2026.
Sumala ni Cebu City Councilor Dave Tumulak sa usa ka exclusive interview sa Bombo Radyo Cebu, nga bisan pa niini, nagpabilin gihapon ang red alert status sa Cebu City.
Gipasalamatan ni Tumulak ang walay hunong nga paningkamot ug koordinasyon sa mga barangay officials, volunteers, ug city responders sa ilang pag-andam ug pagpanalipod sa katawhan batok sa posibleng disgrasya nga dala sa bagyo.
Gihangyo usab niya ang publiko nga magpabiling mabinantayon, ilabi na ang mga residente nga nagpuyo sa mga lugar nga prone sa landslide.
Matod pa niya, bisan wala pay major nga landslide nga natala, posible gihapon ang pagdahili sa yuta sa mosunod nga mga adlaw, ilabi na kon mo-init na ang panahon human sa padayon nga pag-ulan.
Tungod niini, gi-awhag ni Tumulak ang tanan nga magpadayon sa pagka-alerto ug pag-amping aron malikayan ang bisan unsang disgrasya.
Gipasidunggan sa konsehal ang mga barangay responders, workers, ug officials, lakip ang City Disaster Risk Reduction and Management teams ug mga boluntaryo, tungod sa ilang kakugi ug sakripisyo aron masiguro ang kaluwasan sa katawhan atol sa bagyo.
Gihangyo ni Tumulak ang publiko nga magpabiling alerto ug updated sa weather advisories, ug likayan ang mga lugar nga delikado ug landslide-prone.
