CEBU CITY — Gipangandaman sa Municipal Disaster Risk and Reduction Management (MDDRMO) sa lungsod sa San Francisco ang posibleng paghaguros sa bagyong Tisoy.
Gibutyag sa disaster head sa maong lungsod nga si Rosalinda Serion nga pinaagi sa pagpakatap sa mga text messages, mipahibalo kini sa mga kapitan sa matag barangay nga pangandaman ang bagyo.
Gipahimangnoan ang mga kapitan sa MDDRMO sa pagpahibawo ngadto sa mga konstitwente ilabi sa na sa mga kuyaw nga area.
Hinuon kagahapong adlawa wala matod pa silay nasinati nga panag-uwan apan aduna nay panagdag-om ug paghuyuhoy sa hangin.
Matod pa ni Serion ila na usab nga gi-praktis, sukad niadtong bagyo nga Yolanda, ang pre-emptive evacuation diin mohiklin daan ang mga mulupyo dili pa mutugpa ang bagyo.
Dugang pa niini nga mosanong dayun ang katawhan ilabi na nakasinati na kini kaniadto og kapait sa maong supertyphoon.
Dugang pa sa disaster head nga adunay mga covered court, skwelahan ug typhoon shelter sa pagbakwit sa mga residente.
Panawagan usab ni Serion ilabi na sa mga coastal barangays nga mangandam daan ug dili kalimtan ang mga nakat-onan sa gipahigayon nga training kung unsay angayan nga buhaton sa panahon sa katalagman. (Lahvi Quiñones)
