Mas palabihon sa kagamhanan sa Probinsya sa Sugbo, ang pagpakig-alayon sa administrastyon ni President Ferdinand “Bong-bong” Marcos Jr. kaysa sagulan og pamolitika ang iyang trabaho.
Kini ang gibutyag ni Cebu Governor Pamela Baricuatro, atol sa iyang pagbisita og pagpakighinabi sa mga residente og mga nabiktima sa kusog nga linog niadtong nakalabayng Setyembre 30, 2025 sa lungsod sa Borbon.
Matud sa gobernadora nga mas palabihon niini ang pagpakig-alayon sa Presidente sa nasud kaysa hataga’g pagtagad ang pamolitika o mokontra sa administrasyon, gumikan kay sa Presidente gagikan ang tanan nga pundo nga gigamit sa Kagamhanan sa Probinsya.
Sigon niini mao kini ang iyang pamaagi aron hingpit nga mabuhat ang iyang mandato ug mahatagan og pagtagad ang lugar nga nagkinahanglan og tabang sa Probinsya.
Gipasigarbo usab ni Baricuatro ang pagtaas sa Foreign Investment sa Sugbo nga miabot sa 37.8% nga maoy pinakataas sa tanang mga probinsya sa Pilipinas taliwala sa mga katalagman nga nasinati sa lalawigan.
Dugang usab niini, dakong tabang usab ang pagpahigayon sa Association of Southeast Asian Nations (ASEAN) Leaders Summit diri sa Sugbo gumikan kay nadugang usab ni og kalamboan sa Foreign Investments.
Mensahi usab ni Baricuatro, nga andam ang kagamhanan sa Probinsya sa pagpaluyo alang sa paghatag og mga tabang nga kinahanglan sa mga nagkadaiyang Local Government Units.
