CENTRAL VISAYAS-Gilibkas na sa Bureau of Fisheries and Aquatic Resources – Central Visayas (BFAR-7) ang gipatuman nga closed-fishing season o pagdili sa pagpanagat sa dakong bahin sa Visayan Sea sugod niadtong Lunes, Pebrero 16, 2025.
Kini naglaum sa pagdaghan sa produksyon sa mga dinakpang isda sa mga kamerkadohan ilabi na sa amihanang Sugbo kung diin adunay proximity sa Visayan Sea.
Ang closed-fishing season kay gipatuman sulod sa tulo ka buwan nga magsugod sa hinapos sa Nobyembre ug muhangtod sa tunga-tunga sa Pebrero matag tuig agig paghatag og higayon sa mga isda nga makapanaghan sa lawod.
Sa eksklusibong pakighinabi sa Bombo Newsteam kang Johann Tejada, ang tigpamaba sa BFAR-7 nga matod pa kay kanunay nilang gina-monitor sa mga kadagatan sa Central Visayas sa saktong pamatasan sa pagpanagat agig pagprotektar sa kinaiyahan.
Dugang pa sa BFAR-7 nga ang mga lungsod nga doul sa mga dagkong kadagatan kay nagpatuman sab sa monitoring pinaagi sa ilang Bantay Dagat Squad sa pagmatyag nga walay dagkong commercial fishing vessel ang makasulod sa mga municipal waters nga gitagana lang para sa mga gagmayng mananagat.
Ang Visayan Sea usa ka dagat nga napalibotan sa mga isla sa Kabisay-an diin aduna kiniy giutlanan sa mga isla nga Masbate sa amihanan, Panay sa kasadpan, Leyte sa sidlakan, ug Cebu ug Negros sa habagatan.
