Nagpagawas ang Bureau of Immigration (BI) og pasidaan human sa padayon nga pagdaghan sa mga Pilipino nga ilegal nga mibiya sa nasud aron magtrabaho sa lainlaing mga bahin sa Asya.
Gipahimangnoan ni Bureau of Immigration (BI) Commissioner Joel Anthony Viado ang mga gusto nga magtrabaho sa gawas sa nasud bahin sa pagdaghan sa mga ilegal nga tanyag sa trabaho sa lainlaing mga nasud sa Asya, tungod kay nagkadaghan ang mga peke nga recruiter nga nangbiktima sa mga Pilipino nga nangita og trabaho sa gawas sa nasud.
Ang unom ka mga repatriate — duha ka lalaki nga nag-edad og 29 ug 27, samtang upat ka babaye nga nag-edad og 21, 26, ug 29 — miabot niadtong Miyerkules sa buntag gikan sa Phnom Penh, Cambodia.
Sumala sa BI, usa sa unom ang miagi sa ilegal nga ruta o “backdoor” sa Palawan, samtang ang lima mibiya sa nasud isip mga turista gikan sa Manila.
Basi sa mga biktima, ang pangunang target sa ilang operasyon mao ang mga tawo nga nagtrabaho gikan sa balay sa Estados Unidos.
Ang unom ka biktima miingon nga gipangayoan sila og USD 2,000 ngadto sa USD 8,000 para sa ilang kagawasan, apan gipili nila nga dawaton ang sitwasyon, ingon man nga ang usa kanila ang nakaikyas human gimandoan nga moadto sa usa ka mall aron mopalit og mga suplay.
