Nagpahayag ang Bureau of Immigration (BI) sa ilang bug-os nga suporta alang sa pagpatuman sa Republic Act No. 12312 o ang Anti-Philippine Offshore Gaming Operators (POGO) Act of 2025, nga gipirmahan ni Presidente Ferdinand Marcos Jr. niadtong Oktubre 23.
Sumala ni Immigration Commissioner Joel Anthony Viado, ang BI miapil sa Presidente sa pagpatuman sa makasaysayanong reporma nga nagtumong sa pagtapos sa operasyon sa mga POGO sa nasud.
Ubos sa bag-ong balaod, ang mga malapason mahimong mabilanggo hangtod sa 12 ka tuig ug multahan hangtod sa P50-milyones.
Samtang ang mga langyaw nga malapason i-deport human sa ilang sentensya ug gidid-an usab sa pagsulod sa Pilipinas sa tibuok kinabuhi.
Ang RA 12312 dugang nga nagpalig-on sa miaging Executive Order No. 74 nga gi-isyu ni Presidente Marcos Jr. niadtong Nobyembre 2024, nga nagdili sa offshore ug internet gaming tungod sa kalambigitan niini sa mga krimen sama sa human trafficking ug torture.
