Mapasalamaton si Cebu City Councilor ug Committee Chairman sa Cebu City Disaster Risk Reduction and Management Office Dave Tumulak, gumikan kay wala silay daghang natala nga mga kadaot atol sa kinatibuk-ang obserbasyon sa Semana.
Dugang sa Konsehal, bisan walay dagkong insidente ang nahitabo, apan gawas na lang kini sa sunod-sunod nga sunog nga nahitabo sukad gayud pagsugod sa Semana Santa lakip na niini kadtong sunog didto sa Barangay Zapatera, Lahug, ug Ermita.
Mao kini ang pamahayag ni Tumulak atol sa eksklusibong pakighinabi sa Bombo Radyo Cebu newsteam kaniya, aron sutaon ang kinatibuk-ang assessment sa bag-o lang gituldokan nga Semana Santa.
Apan wala gisalikway ni Tumulak ang dako niya nga pagkahibulong subay na sa mga aksidente sa kadalan, nga bisan paman mingaw ang mga karsada, minus ang mga sakyanan, aduna gihapoy mga nadisgrasya.
Samtang, giklaro usab ni Tumulak nga ang tanang places of worships sa Sugbo nga gidagsaan gayud sa mga magtutuo, gipahamtangan nila og mga personahe gikan sa tagsa-tagsang mga barangay responders ug sa Cebu City Disaster team, kinsa mao ang nangulo gayud sa pagpatuman sa hapsay nga kalihokan ug aktibidad sa Semana Santa.
Subay niini, gitataw ni Tumulak nga i-ubos na ang blue alert status sa Sugbo sa umaabot nga Miyerkules, Abril 8, gumikan gipanglantawan usab nga ubay-ubay pang mga katawhan ang wala pa makapauli sa ilang tagsa-tagsa nga gigikanan.
