Personal nga gihatod ni Bohol Governor Erico Aristotle Aumentado kang Governor Pamela Baricuatro ang tseke nga nagkantidad og ₱5 million isip hinabang alang sa mga nabiktima sa linog sa amihanang bahin sa sugbo.
Matod ni Gov. Aumentado, kini usa ka paagi sa Bohol aron ipakita ang ilang panaghi-usa ug pagpasalamat ilabi na nga ang Cebu Province Wala nag duha-duha nga nihatag og hinabang sa lalawigan sa Bohol niadtong tuig 2013 sa dihang giigo kini ug 7.2 magnitude nga linog.
Dugang niya, dili lalim ang gidangatan sa Sugbo tungod sa grabing kadaot nga gihatag ug gibilin sa linog, hinungdan nga angayan lang nga tunulan og hinabang.
Subay niini, nagpasalamat si Gov. Baricuatro sa katawhan sa probinsya sa Bohol tungod sa ilang pagkamanggihatagon ug sa mainitong suporta nga gihatag sa Sugbo, ug giila’g gikonsiderar kini nga tinuod nga ehemplo sa paghiusa sa mga Sugbuanon ug Boholano.
Sa pikas bahin, nasayran nga mokabat na sa kapin P3 billion ang natalang kadaot sa Amihanang bahin sa Sugbo tungod sa linog nga niigo niadtong alas 9:59 sa Setyembre 30, ug adunay gikatahong 70 kapin ang nangamatay.
